Pandicosa, o cabo d’o fracaso d’Aramón arrocegau por a demanda de rescate d’Ibercaixa

O zaguer 12 de chunio o Gubierno d’Aragón de man d’o consellero Bermúdez de Castro, manifestaba a suya firme decicisión de mantener ubierta a estación d’esquí de Pandicosa. Como sincusa, a unica estación amanada enta un nuclio urbano y que seguntes Aramón, “qualques vecins i levan 50 anyos treballando gracias a ella”. Bermúdez i adhibió: “si a estación zarrase, os afectaus perderían as suyas trazas de vida”. Ista, ye una frase pa alzar, una d’ixas alfayas que a politica neoliberal suelta de cabo quan. A evolución d’a población de Pandicosa en decada d’os 90 parixeba creixeba d’una traza estable, dimpués d’a renovación d’as suyas instalacions, con a  incorporación d’o suyo nuevo telecabina y as expectativas d’o suyo desembolique inmobiliario. Chunto con as promesas d’un mainate inmobiliario de revilcar a o suyo concieto, con as plusvalías d’o mundo inmobiliario, unos Banyos de Pandicosa, que no pasaban por os millors intes ni con o refirme d’as inversions publicas. Pero iste numero de población se ha esboldregau en as zagueras anyadas plegando a menimos historicos en 2011 con tasament 820 habitants. Comportamiento parellano en a mesma redolada de l’Alto Galligo u o viello Aragón, do a focalización de recursos enta l’esquí deixa d’un costau cualsiquier atra alternativa y a marguinación d’os lugars no i embrecaus en iste afer.  Con tot y con ixo, lugars y/u ciudatz do as suyas comarcas han mirau enta atras endreceras de desembolique, han visto creixer una población estable, no estacionaria y sin a necesidat d’un cambeo excesivo d’o suyo modelo urbano. Localidatz como L’Aínsa, Bielsa, Broto,… que como minimo no han perdiu población.

Los mesmos que acotoloron toda traza de vida diferent a o turismo d’a nieu, que nian de termalismo querioron charrar-ne, fueras de bella baruca inmobiliaria de “alt-standing”, y que veyoron en o golf a solución perfecta a la manca de dembas urbanizables. Agora se niegan a asumir a reyalidat. O mesmo consellero dició en a suya comparecencia, “a estación de Pandicosa no ha ubierto ni un diya d’iste anyo a o 100%, en Sarllé ha estau posible o 80%, en Javalambre o 46% y en Valdelinares o 30%”.

Una d’as prencipals barucas d’Aramón (Ibercaixa-Gubierno Aragón) ye a refinanciación d’a deuda ta prolargar o plazo de reembolso y aconseguir asinas “una mayor estabilidat”. Manimenos “Bermúdez” ha remerau que as zagueras inversions plegan enta os 46 millons d’euros, d’os quals 26 se’n han destinau enta o prochecto de l’enamplación d’a estación d’esquí de Sarllé (Uesca) por a val de Castanesa. Aramón “no ye un prochecto que ye naixendo, ye un prochecto consolidau” que ha meso dencima d’a mesa inversions por valor de 228 millons d’euros, que significan emplego, desembolique, “pensar en o futuro”¿?.
En l’actualidat a deuda d’o sector plega en os 88.866.233 euros, cantidat d’a qual o 59 % corresponde a la propia Aramón.

Si conoixemos que os Presupuestos d’Aragón ta 2012 se sitúan en 5.328 millons, un 2,65% menos que en 2011 y 59.365.857,62 son endrezaus enta Investigación, Desembolique y Nuevas Tecnolochías. Isto quiere dicir que o presupuesto en I+D ye de 1.1% en Aragón, más sabendo que i puede fer parti a investigación melitar, en unas redoladas con una alta tendencia en iste afer. Pa saber-ne un poco más, podemos dicir que iste porcentache marca en a mayoría de países o ran de desembolique industrial, o porcentache de paro y a exportación. A inversión en I+D en países como Suecia ye de 3,75%, Alemania 2,3%, EEUU 2,7%, Francia 1,9%, Comunidat autónoma vasca 1,96%,… en l’atro costua Espanya con 1.35%.

Si prenésenos o presupuesto d’o Gubierno d’Aragón destinau estianyo enta Castanesa, más la deuda que ha de estar bosada por Aramón ( 228+52.431= 280.43milllons €), podríanos puyar o porcentache de I+D enta un 6,3%. Pero claro ixo no creya especulación, afeccions enta o meyo ambient, bombolla inmobiliaria, ni deuda en os bancos.

A localización de muga que ye aprobeitada en quasi totz os países d’a UE como fuent de creyación d’Industria, emplego y población ye descartada en a planificación Industrial y d’emplego d’o gubierno d’Aragón. Os tres túnels carreteros (Somport, Bielsa y Vielha) y o puerto d’o Portalet son infrautilizaus.

A novedat no radica en que la nieu se vienga abaixo, ixo ya yera claro fa anyos, o mercau inmobiliario tamién; a novedat ye que a voluntat luitadera d’o nuestro Gubierno s’aplique a o esquí y no pas a la sanidat, a educación, os servicios socials, a investigación u a minería. O consellero Bermúdez de Castro asegura que a DGA luitará “con unglas y dients” ta mantener l’actividat d’Aramón, interpresa semipublica que arrociega (oficialment) un forau de 90 millons y nomás en a zaguera temporada en ha perdiu 22 millons.