Charrada “Atro fútbol ye posible” y fiesta en La Botica iste viernes 21 en A Enrestida

Charrada “Atro futbol ye posible” feita por Iñigo Arza, colaborador d’o U.C. Ceares, colaborador d’o blog “Los Ideales del Gol” y esferents medios.

Dimpués,dende as 00:00 horas audición con o Dj Ciareslautern (ska,reggae & punk) en La Botica.

—–

Atro fútbol ye posible, efectivament.

Debant d’o futbol d’os fichajes y patrocinios multimillonarios, o d’os fundos d’inversión y megaprochectos, en o que os aficionaus son vistos nomás como consumidors d’un producto, en o que o important ya no ye ganar u perder sino plegar a vender buena cosa de chambretas de bell chugador, en o que bells chugadors plenan horas y horas de televisión, en o que as collas más potents son cada vegada más ricas y as más humildes cada vegada más pobrichonas, surte unatra mena de fútbol que mira de reviscolar as rides d’iste esporte y fer una alternativa de carácter popular a o fútbol-negocio que impera hue.

Y ye que unatro fútbol ye posible tal y como diz o títol d’a charrada. Dende fa bellas anyadas, son cada vegada más numerosos os prochectos en os que se mira por un fútbol que torne a las suyas rides y reviscole as valors que le facioron estar o esporte popular por excelencia. Prochectos en os que o aficionau torne a estar considerau en prener decisions, en os que recupere o control d’os clubs. A la finitiva, prochectos en os que o fútbol-negocio no culle. En Europa, bi ha bells eixemplos muito conoixius como os d’o FC United of Manchester, surtiu dende una colla d’aficionaus d’o tot-poderoso Manchester United carranyaus con o nuevo accionariau d’a colla, u o d’o Sankt Pauli, uno d’os equipes más carismaticos que bi’n ha. D’atra man, o Estau Espanyol no desconoix istas iniciativas y cada vegada en son más numerosas. Dende o CAP Ciudad de Murcia dica as recients fundacions de collas que cuentan tamién con un accionariau popular en Ourense, Palencia u en Tarragona. Atro caso ye o d’a U.C. Ceares, una colla historica de Xixón que en 2011 cambeó d’endrecera con a dentrada d’una directiva que miró por una más gran intervención d’o aficionau en prener decisions, por una alternativa debant d’o fútbol-negocio en o que s’empentasen as valors d’o futbol como un esporte popular y social. O ponent d’a charrada, Iñigo Arza, fa parti d’o U.C. Ceares y ye un granizo conoixedor d’istas alternativas populars debant d’o fútbol-negocio.