En fa 300 anys (la Diada)

Siempre t’habrás preguntau qué ye isto d’a “Diada catalana” y por qué una sociedat que cudia prou as valors y tradicions da tanta importancia a un diya como iste, clamau o “Diya nacional de Catalunya”, y por eixemplo no pas tanto a un diya como “Sant Chorche” que no ye nian festivo.

A reyalidat y explicación d’o suyo significau ha estau siempre bien amagau por l’espanyolismo, y un pueblo como l’aragonés, que sufrió as mismas conseqüencias que o catalán dimpués d’os Decretos de Nueva Planta, no puede desconoixer iste feito.

L’onze de setiembre de 1714 y dimpués de catorce meses de “sitio”, parola prou conoixida en Zaragoza, as tropas borbonicas a o mando d’o duque de Berwick, en o preto d’a Guerra de Sucesión, facioron cayer a ciudat de Barcelona. Ista victoria esdevinió en l’abolición d’as institucions catalanas en 1716, y l’aplicación d’os Decretos de Nueva Planta.

Os Decretos de Nueva Planta estioron un conchunto de decretos promulgaus por o rei Felipe V de Borbón, ganador de dita Guerra de Sucesión, por os quals quedaron abolidas as leis y institucions propias d’o Reino de Valencia, Aragón, Principau de Catalunya y o Reino de Mallorca, integrants d’a Corona d’Aragón, que s’heban decantau por l’Archiduque Carlos d’Austria, metendo asinas fin a las estructuras d’a Monarquía Hispanica d’os Austrias.

En particular en os reinos d’Aragón y Valencia, Felipe V promulgó o Decreto de Nueva Planta o 29 de chunio de 1707, dimpués d’a derrota d’atra baralla no menos important “A Baralla d’Almansa” (Albacete) o 25 d’abril. Por o qual “declaraba abolius y derogaus totz os referidos fueros, privilechios, practicas y costumbres d’istos reinos, estando a mía voluntat que istos se reduzcan a las leis de Castilla, y a l’emplego, practico y trazas de gubierno que se tiene y ha teniu d’ella, y en os suyos tribunals sin diferencia de cosa”. O proceso remata o 15 de chulio quan Felipe V liquida o “Consello d’Aragón”.