Nogará organiza Chueves lardero u Choricet, iste 27 marzo en A Enrestida

Iste chueves 27 ye Chueves lardero u Choricet, día que sinyala l’inte de surtida d’as garrastolendas u carnavals.
En ista calendata, a chent gosaba salir t’o campo a minchar y soltaban bimardos encletaus improvisaus de tardes; quan o sol yera cacho y se feba de nueit se celebraba o baile d’esfraces. Encara hue, más que más en os lugars, se’n fa alcordanza d’iste día con brendas y entropans de lenguaniza. D’astí a mazada Jueves Lardero, longaniza en el puchero.
Pa os d’Alcanyiz ye una d’as fiestas más importants de l’anyo, pero pa os de Sant Per de Calanda y atros lugars d’Aragón ye agora una fiesta más y no implica deixar de treballar u d’ir ta la escuela.
En belsetán se diz Hueves larder, en benasqués (una d’as pocas parlas altoaragonesas actuals que conserva a denominación aragonesa d’os días d’a semana), se diz Chous llarder, y en Campo Chous gras. En Alcanyiz u Sant Per de Calanda se clama Choricet.
Lardero significa “referent a la graixa animal” y ye un adchectivo que se relaciona con o substantivo lardo, parola que presenta diferents significaus en l’Alto Aragón, totz relacionaus con a graixa, a l’egual que l’adchectivo gras(o) d’a denominación campesa.
Estianyo lo celebraremos en A Enrestida, gallizo Sant Cristóbal de Zaragoza, a ixo d’as 21h.
Viene-te-ne!