Dende que o gobierno d’o PP aprebase a zaguera reforma laboral, muitos son os sendicatos que con menos u más acierto han decidiu de convocar o 29 de marzo una vada cheneral. Al igual que a convocatoria, os datos que han adhibiu a las causas bells sendicatos también son más u menos esplaters y/o hipocritas en bells casos. Nusatros nos disposamos a desembolicar as razons por as que ixe diya iremos t’a carrera, al igual que lo faciemos con l’anterior gubierno:
-A crisis no ye que a sincusa pa enamplar o poder d’a patronal, d’a burguesía. O suyo obchectivo no ye creyar emplego, sino destruyir-lo y deixar una clase treballadera sin dreitos, más pobres, y sin un esbenidero de vida digno.
Treballo
-Os EREs no habrán de pasar por una autoridat (d’a que ya en dudábanos). Agora l’empresario puede aplicar os despidos colectivos quan le pete.
-Desapareix o despido con 45 diyas, enta 33. Manimenos iste zaguero no se ferá servir ya que totz os despidos serán procedents y s’aplicará indemnización de 20 diyas.
-S’extendilla a posibilidat d’expedients en administración publica, limpio a retallar os servicios publicos.
Dreitos
-Contratos de chornada parcial con posibilidat d’hora extras. Endrezados enta las mullers. Amagau en o contrato de conciliación, que en reyalidat torna a la muller enta o franquismo, como aduyant d’a economía familiar y salvaguarda d’a casa.
-Contrato de formación entre 1 y 3 anyos. 481€ o primer anyo y 513€ o segundo y tercero.
-Contrato indefiniu de “refirme enta os empentadors”: despido libre y manca d’indemnización o primer anyo. Nomás en interpresas de menos de 50 treballadors, más d’o 90% en muitos puestos d’Aragón.
-Se torna a empentar o papel d’as ETT’s con más competencias. Chunto con o zaguer compromís de déficit en as comunidatz y a faina centralizadera d’o PP nos amanamos enta la desaparición d’o servicio publico INAEM.
-Quasi desapareix a negociación colectiva. L’horario, festivos y chornal será trigau por o empresario, si asinas lo creye menister, y se ferá servir como aina en un mercau cada vegada más competitivo con os pres por o sulero. Os repuis d’o convenio colectivo vendrán dictaus agora preferenment dende Madrit, sin importar o puesto d’a suya aplicación ni os pres d’a ciudat/lugar do se va a aplicar ixe salario. A viella aspiración d’un convenio colectivo aragonés desapareix de tot.
-L’Estau español antis de deixar a suya faina lechisladera en o marco laboral, ha imposau ista nueva reforma que guaranciará os privilechios d’o capital d’aquí enta o futuro.
A Enrestida 