Irlanda d’o Norte: más y más polbo debaxo de l’alfombra

Fa tiempos que no se charra d’Irlanda d’o Norte en as notizias, cuan una decada tazaga parolas como Ulster, Belfast u Derry yeran ditas semana par d’atra, sino de contino. Y ye que parixe que dende l’alcuerdo d’o Biernes Santo de 1998 as badas de fambre d’os prisioners politicos y a represión d’as instituzións britanicas enta os republicanos s’han xublidau… nomás parixe quedar bel repui de disconformidat que espleita en traza de baralla de cabo ta cuan, y cada begada menos. A situazión de normalidat se da por cheneralizada dende a tregua de l’IRA Provisional en 2005 y a reinstaurazión de l’Asambleya d’Irlanda d’o Norte en 2007, tras una curiosa supresión de dita instituzión en 2003. ¿Y tot isto por qué? Por una teorica bizefalía de republicanos y unionistas en o poder, con una superbisión irlandesa y britanica, con un desarme de paramilitárs y con a guaranzia d’a salbaguardia d’os dreitos d’a poblazión republicana.

En Belfast, uno marcha t’os murals unionistas de Shankill y os republicans de Falls Street y compreba que agora son una atrazión anque os taxis locáls quitan dinérs fendo cursas ta dezenas de turistas que marchan ta fer-se fotos… se plega a contimparar a situazión con a de foranos fotiando atros puestos do s’han desembolicau guerras u barallas y que agora ya son pazificaus, cuals foraus de bombas en o Pilar u balas en a Puerta d’o Carmen. Pero de bote y boleyo, a ixo d’as 6 oradas uns muros metalicos trancan as suyas puertas separando ditas redoladas: allora ye cuan uno dispierta d’o país d’a piruleta en que se ha conbertiu a ziudat de maitíns y meyodiyas, y prenzipia a entender atras cosas.

Escando en as notizias, en o 2009 tornón os muertos y en chunio d’ista añada un polizía republicano estió asasinau por unionistas, de bez que en Derry una manifestazión unionista pasando a o canto d’o bico catolico, que a suya entrada se marca con un Welcome to free Derry y do un dublinés nos deziba con argüello que astí nunca no eba dentrau garra polizía ni militar britanico, remató en o secuestro y cremada de bels autos. Atamás d’os disturbios de Short Strand, con bels ferius de bala.

As posizións son bien definidas, y luen de parexer continar con ixa conberchenzia en pautos, a custión parixe esbarrar-se más y más.

Os unionistas se consideran perchudicaus con a situazión que s’ha dau tras os alcuerdos d’o Biernes Santo, con una poblazion catolica que ta els tiene o mesmo poder que a protestante estando menos numerosa. A igualazión en dreitos asegurada por una comisión espezial de dreitos umanos les ha perchudicau: os republicanos han dixau d’estar esclabos y agora son direuta competenzia d’os protestáns en o mercau laboral y en posibilidaz de dentrar en o funzionariau.

Os republicanos beyen como o esprito d’os Acuerdos de Belfast se ye conbertindo en una mena de estatus quo aturau, perpetuando una situazión prebia a la d’un cambio que nunca no se da. Se les diz debán de tot que cal salbaguardar a paz y o esprito conziliador, pero os resultaus de “fer as cosas bien” no plegan.

En o fundo, parixe que ixa teorica bizefalía no ye so que una mena de contentar a toz y no contentar a dengún dentro d’os esquemas chenerals de un estau neoliberal, isto ye, un estau alazetau en o conzeuto de cherarquía, que en o suyo fundo implica pillar dezisións de traza cada begada más indibidualizada. Dito d’atra traza, se puet estar tot o diplomatico y correuto que se quiera, promobendo un teorico estau bizefalo, pero siempre s’habrán de pillar dezisións y por muito que bi aiga una bizefalía en ixa cherarquía que las pilla, bi’n abrá que perchudicarán a uns en pro d’atros y a’l biés. Os protestáns considerarán que igualar os dreitos les perchudica (prou que no lo dirán asinas, que lo formularán con atrás parolas más polidas) y os republicanos, minoría encara que por no guaire, continarán pensando que ista nueba formula no soluziona as suyas aspirazións lechitimas (y más parando cuenta que son minoría más que más por a emigrazión de norirlandeses enta Irlanda en a puenda de represión britanica). Tanimientras, as instituzións feitas dentro d’o marco neoliberal ta soluzionar o problema de gobernanza de dos pueblos en una mesma tierra se muestran incompeténs, y l’onico que fan ye mirar de retrasar (u enrastar a “suburbios”) una biolenzia y uns sentimientos enfrontinaus que crexen más y más, d’a mesma traza que un galbán bibidor amaga o polbo debaxo de l’alfombra toz os diyas.

Aquesta entrada ha esta publicada en A Enrestida, Articlos d'opinión. Afegeix a les adreces d'interès l'enllaç permanent.

Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s