A triple opresión d’a muller: cudiadora

A triple opresión a la que somos sozmesas as mullers y d’a qual fan parte chénero, clase y territorio, se fa más fuerte en totz os aspectos baixo o sistema capitalista. Os alacetz d’iste sistema no nomás son a replega d’a riqueza material, sino tamien a expoliación intensiva en a que dentran en chuego a cultura y a intelichencia coleutiva, a capacidat de creyar cultura d’un pueblo. Ista expoliación d’o conoiximiento d’un pueblo ye a traza de funcionar d’o capitalismo, que ye qui absorbe de tot a o ser humano, dende a suya fuerza moscular bruta dica a suya intelichencia y cultura, quan las torna en una mercancia, destruyindo mesmo os alacetz más simbolicos, referencials e imachinarios d’os pueblos que esboldrega.

                ¿Por qué ista triple opresión se veye acentuada baixo o sistema capitalista?

                O capitalismo mira que o papel d’a muller siga cara o cudiau d’os fillos e fillas y en o treballo domestico, tornando-la en una simple productora de beneficio psicosomático t’o capitalismo que ocupa al pueblo oprimiu t’o que perteneix a muller. A muller contina estando clau en a socialización d’os primers y decisius anyos de vida a traviés d’a transmisión lingüístico-cultural, y conserva a suya influyencia en a socialización d’a adolescencia. O capitalismo conoix iste feito prou bien, alavez l’alineación d’a muller ta iste sistema ye clau ta que produzca seres alienaus dende o prencipio, lo qual ye una necesidad importantisma ta fer más gran a replega capitalista. Iste s’encarga de mercantilizar a primera infancia ta fer más grans os mercaus, aumentando o consumismo y a financiación d’a existencia, con cuentas d’ahorro ta recién naixius y de credito ta chovens, entre atras.

                Antimás tien en cuenta o papel fundamental d’a muller en o cudiau d’as personas mayors, creyando mercaus especificos ta la suya comercialización más que más en a industria d’a salud.

                D’atra man, en os pueblos oprimius, iste efecto se multiplica por tener un problema adhibiu como ye a negativa d’a libertat d’autodeterminación y a inexistencia d’a suya propia nación-estau que le faiga poder chestionar o suyo esdevenidero. Tot isto fa que as cargas d’a muller d’o pueblo oprimiu se faigan más duras, porque que ye ella a que, como hemos veyiu, sostien en buena mida o tarabidau d’a explotación. Manimenos, o suyo alineamiento nacional será decisiu ta mantener o poder d’o pueblo ocupant, o suyo alineamiento clasista como treballadera será decisiu t’o mantenimiento d’o sistema burgués y o suyo alineamiento como “muller” será decisiu ta la pervivencia d’o patriarcau. Iste triple alineamiento será decisiu ta la socialización d’os fillos e fillas, recutindo-ie de traza dreita.

                Por atro costau, a opresión no remata quan as mulleres marchan d’a casa, o si han decidiu no tener fillos u fillas, o si as mesmas han creciu. Presions materials e ideolochicas fan mezclallo, por eixemplo, ta persuadir a las mullers de que treballen por chornals más baixos d’os que a mayoría d’os varons aceptarían o aceptan, en a mayoría d’os casos, achustes temporals con os que no tien una protección laboral, isto fa, entre atrás cosas, que as mullers se qüestionen a maternidat.

O capitalismo tien os suyos alacetz en obtener a mayor plusvalía en o menor tiempo posible, en a especulación,  en a explotación d’as personas y en a supresión d’os beneficios y prestacions socials adquiridas con luengas anyadas de luita. Iste capitalismo, con gran aumento en iste periodo de crisis ye fendo que a muller sia la mayor perchudicada con reformas que por eixemplo, retrasan a edat de chubilación lo que aumenta encara más a nuestra precariedat. Tamien a explotación se ye centrando y se centrará encara más sobre nusatras. O trestallo de chornals, a precariedat en o treballo, tallar as prestacions socials, a economía sumerchida, a feminización d’a pobreza d’entre atros, son fendo mella especialment en a vida d’as mullers.

Sin rematar con a triple opresión ye imposible continar enta debant en a construcción coleutiva d’o pueblo.

“Articlo amaneixiu en o fancine Esmo feito con enchaquia d’o festival Artieda’11″