Manifiesto:
As personas que puyamos a nuestra voz dende Aragón sabemos que a sociedat ye cambiando. A crisi s’ha instalau en a economía, en o meyo ambient y en as nuestras vidas. Crisi d’un sistema capitalista que ha convertiu a dignidat d’as personas en un luixo inamanable.
Esfendemos atra traza de treballar y de vivir, pues ye en chuego a vida y a felicidat de millons de personas. Mientres banquers y executivos telefonicos cocinan despius masivos de treballadors, s’empochan primas multimillonarias que guaranciarían, cadaguna, a supervivencia de cients u mils de familias.
A crisi la ha provocada ista chent famosa y con poder, pero la bosamos personas anonimas. As suyas conseqüencias son fatals t’a humanidat, aquí y en atros países y continents. T’a salut d’a Tierra, t’a paz mundial y t’a nuestra vida cutiana. No queremos perder os nuestros dreitos ni retallar-los encara mas ta protecher os privilechios d’uns pocos que rematarán amos de todas as riquezas.
En Aragón a crisi ha provocau que haigamos empiorau as nuestras condicions de vida, pero tamién l’estau cheneral d’o nuestro territorio. O despoblamiento rural facilita a implantación d’industrias muito contaminants y con radius puestos de treballo.
L’anglucia neoliberal ha levau a una explotación crudel d’os nuestros ríos y os nuestros recursos. Continamos tenendo prochectos d’entibos que menazan lugars y ríos vivos. S’estricallan paraches singulars d’alta montanya por a fiebre d’a especulación inmobiliaria. Se desertiza a tierra por a sobreexplotación d’o campo.
Nuevos colectivos chovens nos paramos ta luitar porque cambeyen as cosas. Chents de tot lo territorio dentramos a movilizar-nos en esfensa d’una vida digna y d’o nuestro entorno.
En as nuestras mans ye cambiar o curso d’iste viache insensato ent’a inchusticia y a desigualdat. Amenistamos atra traza de vivir, atro modelo, y lo queremos ya.
ARAGÓN:
ESFENDER O TERRITORIO,
CAMBIAR O MODELO
– POR O REPARTO EQUITATIVO D’A RIQUEZA: UN NUEVO MODELO SOCIAL Y PRODUCTIVO
– BI HA ALTERNATIVAS: ESTALBIO Y ENERCHÍAS RENOVABLES. NO PAS A LAS FOSILS Y NUCLEYAR.
– POR A MILLORA D’OS SERVICIOS PUBLICOS: EDUCACIÓN Y SANIDAT DE BALDES, UNIVERSALS Y DE CALIDAT.
– CONSUMO CONSCIENT Y RISPONSABLE. POR UNA ALIMENTACIÓN AMANADA Y SANA.
– POR UNA CULTURA LIBRE Y POPULAR, EN ESFENSA D’AS NUESTRAS LUENGAS Y ESPACIOS COMUNITARIOS.
– ACCIONS COLECTIVAS T’O CAMBEO QUE QUEREMOS: DEMOCRACIA VERDADERA!
– LUGARS, MONTANYAS Y RÍOS VIVOS. NI ENTIBOS NI TRESCOLES.
– NO PAS A LA POLITICA D’O MALFURRIE Y GRANS EVENTOS.
– PAZ CON CHUSTICIA SOCIAL: DREITOS TA TODAS.
SABADO 14 DE MAYO 17 HORAS
PASEU INDEPENDENCIA
ESCAPARATE CIUDADANO
D’A CRISI
DOMINGO 15 DE MAYO 12 HORAS
PLAZA ARAGÓN
MANIFESTACIÓN
http://redcolectivosaragon.blogspot.com/
A Enrestida 