“Con l’afán de negocio a Sociedat ha tresbatiu o control d’a Cultura Popular. Ya no existe o gusto de tanyer una guitarra ta compartir melodías, actuar pa compartir historias, retratar t’amostrar escenars…hueit, y gracias a o monopolio cultural ixo cuesta Diners a sovent…
A mesma enchaquia que ha chenerau a Crisis economica ha provocau o “batacazo” intelectual. L’acceso enta la cultura cada vegada ye menos libre, s’imposan tasas y se mira d’implantar una lochica capitalista que se mincha cualsiquier mica d’espontaneidat. O monopolio cultural tiene calendata muga, ya ha demostrau estar insostenible y somos asistindo a la zaguera flama de cirio que s’amorta.
A sociedat ha enantau y se ha posau devant d’iste”batacazo” metendo herramientas por meyo d’as cuals a Cultura Popular se puede refirmar luen d’o gran mercau global. As licencias libres deixan a os creyadors compartir a suya obra sin caciegar os suyos dreitos. “Bell unos dreitos reservaus” en contraposición a o Copyright. Sociedatz como SGAE no entienden que si una peluquería mete mosica no ye con a fin de lucrar-se sino pa ufrir una valor anyadida a o suyo producto. ¿Tiene sentiu cobrar-le un canon?, ¿no ye más lochico que dita peluquería faiga una exposición publica d’a obra d’un artista dando a conoixer o nombre d’iste? L’artista en garra caso pierde, si ascuitan a tuya mosica ganas. O feito d’ascuitar mosica, disfrutar d’unas fotografías, huellar un cuadro, ir ta un recital… no puede veyer-se sumerchiu en dentro d’una mochica mercantilista que ha provocau a suya propia lapidación.
Ye menister demostrar con l’exemplo que atras trazas de cultura no nomás ye posible sino que navega. I hai mils de exemplos. De feito, i hai muita más mosica, poesía, literatura u teyatro difuera d’as Canals comercials que en dentro d’as mesmas. Por una cultura libre y popular queremos amostrar a reyalidat que en os meyos de comunicación nos niegan, dando voz que a los de siempre. I hai mils de exemplos huellables y ye en as nuestras mans compartir-los, conseguir que a rueda capitalista se trobe con barraches en o camín que la faigan deixar de roldar.”
O proximo mes de setiembre, a lo largo d’os diyas 16, 17 y 18, se celebrará una muestra de cultura libre made in Zaragoza:
“Enamplando o silencio” aon que os suyos ciudadanos van a poder conoixer atras trazas de cultura luent d’a que cutio se nos amuestra embotada y presta pa consumir…
Ista iniciativa ha surtiu d’a colaboración entre a Oficina d’o Plan Integral d’o Casco Historico de Zaragoza, a Chunta de Distrito d’o Casco Historico, Zaragoza Cultural y o colectivo mosical magofermin, y quiere fer huellable a existencia d’una cultura alternativa pero de vez popular y librepensant, que se desembolica dende un vico de Zaragoza, a Magdalena, aon que i hai muitos exemplos de treballo en ista endrecera que entre atras cosas han empentau a recheneración d’un vico con problemas soiurbanisticos, a traviés d’a cohesión social, a interculturalidat, y atro puyal de valors integradors.
As chornadas s’ubrirán o chueves 16 de setiembre con una charrada-taller sobre licencias libres. O colectivo magofermin presentará as chornadas “Enamplando o Silencia” y nos charrará d’a suya experiencia en a edición baixo o sistema Creative Commons. Como fuga, contaremos con a participación de Javier Prenafeta, abogau especialista en Tecnolochías d’a Información, que adibirá a visión churidica d’o funcionamiento d’ista mena de licencias, as suyas modalidatz, aventallas y inconvenients y os trangos adecuaus pa rechistrar una obra por ista endrecera.
A chornada d’o viernes prencipiará a meya tardi con un acto simbolico a favor d’a cultura libre, en o que diferents colectivos deixarán constancia d’os pensamientos alternativos que dan sentiu a ista mena de concebir a cultura.
A partir d’as hueito, escomencipia a daria ta la mosica. Cuatro collas de trazas muit diferents, pero que comparten as trazas d’entender a difusión d’a suya mosica, al editar baixo licencias libres Creative Commons, nos ufrirán o suyo directo: Mallacán (mestizache festivo cantando en aragonés), Los Draps (Dende o Matarranya mosica comprometida), Himura (metal extremo) y Big Head Down (hardcore con melodía).
O tercer diya (sabado 18 de setiembre) será una firme chornada en a que dende as primers horas d’a tardi comportirán espacio en a Ribera Madaleniense de l’Ebro diferents actividatz ta espardir y ementar a participación ciudadana en a cultura colectiva y libre.
Prencipiaremos con actividatz pa ninos desembolicadas por dos colectivos d’o vico con un firme recorriu en a educación sin prechuicios: Gusantina y AMPA Tenerías. Más t’adebant se ferá una trobada/muestra de colectivos aragoneses, entidatz socials y vecins que favoreixca o conoiximiento mutuo y a interacción entre ellos.
Creyar un ambient adecuau en una muestra siga cual siga a suya fin, ye fundamental, por ello en a tardi se celebrará una brenda popular vechetariana (opción vegana) ta cargar baterías, y un Taller de Radio Libre entretendrá a nuestras orellas, por lo que desfilarán as diferents iniciativas participants y tot aquel espontaneo que tienga instinto radiofónico.
¿Y qué millor cierre pa unas chornadas que tornar a ir de concierto? Ista vegada serán cinco collas, cuatro d’o prochecto magofermin y un combidau forano, os que a partir d’as 21:00 horas nos ferán baixar a brenda: Txirigol (post-rock introspectivo dende o Matarranya), Rebel Spell (ska fiesta reggae caribeña), Gen (rock canalla y punchudo), Picore (post rock raret) y Ox Scapula (dende Reino Uniu con muita delera).
Programa resumen ‘Enamplando o silencio’
Chueves 16
19.30h. Charrada taller sobre licencias libres.
A Enrestida (Callizo San Cristobal, s/n)
• Presentación d’as chornadas, experiencia magofermin con as licencias libres
• Intervención Javier Prenafeta – Abogau especialista en Tecnolochías d’a Información
• Explicación por trangos d’un caso practico d’edición de material baixo creative commons
• Preguntas frecuents
Viernes 17
18.00h. Acción pro Cultura libre
20.00h. Concierto con collas editadas baixo licencias Creative Commons por o siello aragonés Magofermin: Mallacán + Los Draps + Himura + Big Head Down
Riberas del ebro (pista patinache chunto a Q4)
Sabado 18
Riberas del ebro (pista patinache chunto a Q4)
17.00h. Actividatz pa ninos (Gusantina, AMPA Tenerias)
19.00h. Brenda vechetarina (opción vegana)/Taller de radio Libre/Trobada de distris y atros colectivos aragoneses
Colectivos confirmaus: A Enrestida, AIPEM, Arrebato, ASAPA, Biblioteca Frida Kahlo, Caracol Zaragoza, Ciutat Podrida, Comité de Solidaridad Internacionalista, Coordinadora Antifascista, Distris Genosas, Güembras Foscas, Komando Güebo, La Pantera Rossa, AA. VV. de la Madalena ‘Calle y libertad’, ALasBarricadas, Ligallo de fablans, magofermin, Malaraza, MofleteHumano 9, Nogará, Pedalea, Producciones Con las Uñas, REAS, Red de apoyo a sin papeles, Simbiosis, Towanda.
21.00h. Concierto en as riberas con collas editadas baixo licencias Creative Commons por el sello aragonés Magofermin y un invitado especial desde UK: Txirigol + Rebel Spell + Gen + Picore + Ox Scapula
A Enrestida 