Istos diyas se ye celebrando a “Aste Nagusia” de Bilbao. Muito se ye charrando en zagueras sobre as fiestas vascas, a politización y as actividatz viedadas por a consellería d’interior en exhibir bella foto de bell preso politico. Tema iste tamién prou recurrent en zagueras dentro d’a prensa espanyolista a o filo d’a republica cubana.
En Aragón en tenemos experencia arrienda, as fiestas de totz os nuestros lugars y ciudatz son politizadas de tot por una relichión espanyolista que sacraliza y politiza cualsiquier acto y fa tanyer l’himno espanyol con cualsiquier sincusa.
A fuga de tot iste fenomeno posterior y anterior a o franquismo la podiemos vivir fa dos anyos con a puyada d’o sinyal espanyol en plenas fiestas d’o Pilar. Allora uns pocos nos en faciemos y saliemos ta carrera ta protestar-ne. Pero a resta d’a población no se’n fa mica y veye con total normalidat ista politización.
En Bilbao y a C.A.V. dende a dentrada en o gubierno d’o PSOE, precisament o mesmo partiu que gubierna en Zaragoza, han feito un poder por sacar o que, allí claman politización d’as fiestas, pero que en Aragón veyen con plena normalidat. A consellería d’interior ha creyau nuevas normas y leis que fan de traveta en a paranza de cualsiquier acto reivindicativo en as fiestas.
Dimpués d’as fiestas de l’anyo pasau dos “Konpartsas” d’as que meten barra y escenarios, y podríanos dicir que as que más actos organizan: “Kaskagorri” y “Txori Barrote” estioron denunciadas o l’alcalde de Bilbao (PNV) y viedadas de meter cualsiquier “Txozna” en as proximas fiestas. A primera siempre representada con o sinyal d’os irreductibles “galos” y a segundo por o muxón penchau d’a rella.
Estianyo, y aproveitando a vesita de bells miembros de AE enta Bilbao, podiemos capuzar-nos de tot iste ambient festivo. Conciertos arrienda, actividatz culturals, chuegos, pasavillas,…
L’“Aste Nagusia” de Bilbao, dende a rematanza d’a dictadura, ha estau un puesto de referencia aon que as fiestas populars y a reivindicación ha puesto contrarrestar a maquinaria de politización y sacralización de l’Estau espanyol. Aquí tos deixamos una chiqueta muestra d’o que podemos trovar en l’Arenal d’a ría de Bilbao arredol d’as suyas “Txoznas”.
Fiestas de l’Ánchel y San Lorient ya son pasaus; os Pilars son amanaus. Fiestas de raso politizadas por os respectivos concellos y gubiernos. Pero en Aragón tenemos un puyal de temas a reivindicar: YESA, crisis, lei de luengas,… as carreras son nuestras!
A Enrestida 