http://www.dailymotion.com/video/xe9mho_artieda-2010-esfendemos-a-tierra_news
O festibal “ Artieda 2010 – Esfendemos a Tierra” tornaba a fer-se presen en o lugard’Artieda d’a Aragón,
puesto de resistenzia que contina estando uno d’os millors exemplos de luita y dinnidat en Aragón. Iste lugar ye baixo a menaza d’o recreximiento de l’entibo de Yesa y por ixo a suya chen contina en a luita por a esfensa d’a tierra.
Prinzipió por terzera begada o festibal, y lo fazió dende o biernes 16 de chulio, fendo-se una asambleya d’o MLNA. En ista rufierta se troboron esferens personas de tot lo país. Asinas se fazió una rufierta an que se ascuitoron as esferens ambistas d’a chen, alufrando-se o gran intrés d’os chobens d’iste país en continar a luita por a esfensa d’a tierra y en pro d’a independenzia y a liberazión sozial. Melitans d’o Bloque Independentista de Cuchas charroron d’as suyas organizazions (Puyalón de Cuchas, A Clau Roya, Purna y A Enrestida) y amostroron os trangos feitos en una añada, antimas tamién se podió ascuitar como organizazions chirmans como Uca y Soa alentaban a rufierta.
Dimpués faziemos goyo con una audizión an que s’ascuitoron esferens dj’s d’a scena Aragonesa. Os dj’s d’a “Llitera tropical y cangrejera” ubrioron a nuei mosical con un bideo que cuacó a toda la tabierna que yera a rebutir. Dimpués d’a sesion lliterana, autuoron os dj’s “Groovy Granpa” y “Tal’infernoytorna”, fendo serbir a mosica como ferramienta de borina, si; pero de luita tamién…
Una gran nuei que con tot y con ixo no feba prexinar o que asperaba ta lo diya benien.
O Sabado amanixió con un buen orache, y plego lo bus dende Calatayut y Zaragoza, encara 
que no yeran os unicos en plegar-ie, ya que tot lo sabado estió un contino de plegar-ie chen y chen en autos, furgonetas, u mesmo bizicletas. Como en zagueras edizions, tamien se i amanoron esferens delegazions internazionals como compañers de Castilla, Euskal Herria u d’os Països Catalans.
A primera autibidat d’o sabado estió una charrada sobre “Conflictos meyoambientals dende l’ambista feminista”. Asinas ascuitemos a organizazions como “Bardenas Ya” y “EHT Gelditu”( ambas dende Euskal Herria) charrar d’istos afers. Tamien se beyo l’ambista d’as compañeras d’a Clau Roya y l’afer d’o desembolique d’a muller rural. Ta rematar ista charrada, bezins d’Artieda nos amostroron as zaguers nobedatz d’o recreximiento de Yesa, amostrando-nos que l’entibo de Yesa contina estando una menaza ta la chen d’iste lugar.
Dimpues d’ista autibidat se fazió a chenta popular an que se i troboron más de 200 personas. Una chenta popular que fazio goyo a totz, y que estió acompañada de charradetas, mosica y muitas risas. Sin duda, unas d’as autibidatz que mas fa arroclar.
Dimpúes d’a Chenta Popular, se ubrioron as autibidatz d’a tardi prinzipiando con una Yimkana Antipatriarcal, parada por as compañeras d’a Clau Roya y que quereba trucar o ficazio d’as inchustizias patriarcals que a ormino se fan en a nuestra soziedat.
A tardi continó y a luenga aragonesa , como tot lo diya, estio una d’as protagonistas. Pues se fazió en a plaza d’o lugar un teyatro en Aragonés ta ninas y ninos. A compañía de teyatro que i partizipió se clama “Os alguebanaires” y a chen choben, y no tan choben, disfrutó con una d’as suyas obras clamada “ O Yayo Bolador”. Ta rematar as autibidatz d’a tardi, a chen quereba unas d’as actuazions mas asperadas, o pasabillas con a colla musical “ Profés Prou”. Ista ye una 
d’as autibidatz an que a chen mas i partizipa. Más de 200 personas acompañoron o pasabillas, an que se ascuitoron cantas tradizionals, populars y combatibas. Antimas, iste pasabillas ye interchenerazional, pues se i trobán esferens chenerazions con chen d’o lugar y de difuera d’iste.
Ya dimpúes d’o pasabillas, o pabellon ubrió as puertas y más de 600 personas esfrutoron dende o prinzipio d’o conzierto. A primera colla en i aparixer estió China Chana, uno d’os grupos con mayor procheczion en o nuestro País. Ista colla de rumba y flamenco, cuacó a totz os asistens, que dende o prinzipio d’o conzierto no aturoron de bailar. Dimpúes tañó lo rolde de Rebel Spell, colla que gosa de fer serbir ritmos de ska ta animar t’o publico.
Cuan a Rebel Spell remató a suya actuación, prinzipio uno d’os intes mas espezials d’a nuei, l’acto politico. A chen choben d’Artieda puyó enta l’eszenario con una pancarta an que se leyeba “Esfendemos a Tierra – Entibos No Pas”. Un representant d’o Bloque Independentista de Cuchas presentó l’acto politico y dimpues uno d’os chobens d’Artieda leyó una carta feita por ellos mesmos an que amostraban a dinnidat d’un pueblo a querer bibir y a luitar contra la especulación d’o formigon, barro y zemento. Rematando l’acto politico con o pabellón a rebutir chilando totz chuntos “Yesa No”, u “Artieda No Rebla”. Una begada remató l’acto politico aparixieron os Prau, colla beterana que nunca no manca en ista mena de festibals. Dulzainas y gaitas s’ascuitoron en a suya actuación, antimas de cantas de raso en Aragones y que amostran a reyalidat d’iste País. Sin duda, una d’as actuazions d’a nuei.
Dimpues d’os Prau, yera o turno d’a colla “Banda Batxoki” que beniba dende Iruña.
Yera a primera begada que tañeban en Aragón, pero no lo parixeba. Pues muita chen que i yera sabeba ya as suyas cantas reibindicatibas. Muita caña, muitas risas y una tremenda actuazión estio a remeranza d’ista colla en Artieda.
Ta rematar o conzierto, os Gen escargoron a suya rasmia mosical en forma de cantas rapedas y letras rabiosas que animó a totz. Os Gen estioron tañendo y cuan remataron ya i eba os primer rayos de luz en o lugar.
O Domingo prinzipió d’una traza que animo a muita chen a partizipar en a primera autibidat d’o diya, un pasabillas con a colla de mosica tradicional “Os Gaiters de Chaca”. Ista colla ye bien conoixida en os roldes de luitas meyoambientals en a Chazetania, pues gosan participar en manifestazions en contra d’entibos. Mesmo en Artieda ya eban tañiu bellas begadas. Muita chen s’amano en o pasabillas y de nuebas remató tot lo mundo en a plaza d’o lugar esfrutando con ista colla. Tanimientres a organización paraba a zaguera autibidat d’o diya y d’o festibal que estió a Chenta Popular d’o domingo. De nuebas muitas mesas por a plaza, y mesmo en bellas carreras. Platos, mosica y muitas risas s’ascuitaban de contino.
Y china chana plegó lo fin d’o festibal. Muitas cosas han quedau dezaga como a campaña anual “Esfendemos a Tierra”, mosica, esmo y reibindicazions, pero sobretot beyer que lugars como Artieda u Biscarrues no son solencos en a luita. Beyer que i ha un compromiso d’o Bloque Independentista de Cuchas con o País ta luitar y aturar macroprochectos como Aramon u Gran Scala, como l’entibo de Mularroya u a mina de Borobia.
“Esfendemos a Tierra”, no ye que solo un slogan. Ye una campaña que no s’aturará dica estricallar totz aquels prochectos que esferran nuestro País, y lo dixan como un territorio chusmeso baixo lo capital. “Esfendemos a Tierra” ye una campaña que ha de continar dica que Aragón torne a estar un País libre y soberano an que a chen pueda vivir con dinnidat en os suyos lugars.
Esfendemos a Tierra
Bloque Independentista de Cuchas
A Enrestida 