O colectibo A Clau Roya en colaborazión con o BIC (Bloque Independentista de Cuchas) y UCA (Unibersidat Coleutibo Aragonesista) ha organizua a I Chornada Feminista Internazionalista, que se zelebrará en Zaragoza o proximo 26 de Febrero de 2010.
L’obchetibo d’ista chornada ye dar a conoixer o nuebo prochecto colectibo feminista aragonés A Clau Roya acompañada por organizazions y personas embrecadas en a luita feminista y por a libertat como son Doris Benegas (Castilla), Bilgune Feminista (Euskal Herria) y Cau de Llunes (Països Catalans).
Nos fería arrienda goi de contar con a buestra presenzia en ista chornada y tos demandamos que faigaz la espardaz a todas aquellas personas u entidaz que podesen estar-ie intresadas.
Ta cualsiquier consulta podez contactar con nusatras a trabiés d’o nuestro correu electronico.
aclauroya@gmail.com
Un saludo reboluzionario,
———————————–
A CLAU ROYA
A Clau Roya ye un colectibo que naixe de dentro d’a cucha independentista aragonesa y cuya finalidat ye bisibilizar, potenziar y fer fuerte a presenzia femenina en a luita reboluzionaria. Entendemos o feminismo como a clau que cal ta ubrir o camín que derrote a o sistema patriarcal, imperialista y capitalista imperante en a soziedat. As mullers, nomás por estar-ne, sufrimos en o millor d’os casos una doble discriminazión, de clase treballadera y de sexo, por no charrar d’as que’n soportan aquellas mullers que antimás son inmigrans, de raza “no blanca”, lesbianas, etz.
Nos sentimos erederas de todas aquellas mullers que luitón y dión a suya bida por liberar a la muller d’os suyos estrinques. Estrinques imposaus de traza “natural” por ista soziedat feita por ombres y ta ombres. No queremos estar líders, no queremos una soziedat marcada por as cherarquías, nomás miramos de que a parola igualdat u a chustizia sozial deixen d’estar un slogan buedo de muitos colectibos que lo fan serbir como siñal y nian saben lo que significa. Tenemos a parola y o compromís, no azeptaremos que en a cucha se reproduzcan os rols masclistas que se dan en a soziedat, denunciando-los y empentando una partizipazión más actiba d’a muller en a cucha reboluzionaria.
Plegadas en iste punto emos considerau importán remarcar a relebanzia que tiene ta las mullers o conoiximiento d’o feminismo, no definiu como l’antitesis d’o masclismo (ya todas conoixemos as ferramientas d’o patriarcau), sino como a busqueda y esichenzia d’a igualdat reyal y legal en a soziedat, plegando a nuebas significazions que nos metan como iguals difuera de cualsiquier subordinazión.
Por tot isto creyemos, y en ello imos a endrezar o nuestro treballo, que isto ha d’estar una luita colectiba, pero debán de tot personal. O nuestro obchetibo ye o de creyar una linia de treballo que nos aduye a formar-nos, enriquir-nos y creixer, asinas como creyar un aria de treballo en a cual bisibilizar a nuestra reyalidat en toz os ambitos, más que más dentro d’os mobimientos sozials y reboluzionarios.
Dende A Clau Roya reclamamos un cambio transbersal y radical d’a soziedat, d’astí a nezesidat de creyar un colectibo que nos dé a pertenenzia de colla sin sentir-nos relegadas a l’ombre. No queremos estar nomás l’apelliu d’a resta d’organizazions, sino a parti zentral d’a luita. Remeremos que l’orichen d’o patriarcau ye mui anterior a la d’o capitalismo, creyemos que una luita anti-capitalista y anti-imperialista que no baiga de bez y en compañía d’una luita contra o patriarcau y a bisión androzentrica d’o mundo no ye una berdadera reboluzión, ya que deixa d’un costau a o 50% d’a suya poblazión.
Creyemos que A Clau Roya be d’estar nomás formada por mullers, debiu a que nomás con a unión d’as mullers en colectibos feministas se podrá fer un luita consecuente, que a la fin repercutirá en toda la soziedat; pensamos que si no ye asinas podemos “cayer” en os perniziosos rols (identificaus, pero en enchaquias masiaus subchetibos) de subordinazión. Nomás azeptamos a reyalidat y miramos d’adaptar-nos a ella con o deseyo de que en un futuro istas midas no sigan menister.
En cualsiquier caso dende A Clau Roya queremos y deseyamos ascuitar opinions y socherenzias que puedan plegar en a nuestra asambleya dende colectibos de diferens ambitos, asinas como enriquir a aquellos que quieran fer as suyas nuestras ideyas.
“Ni tan furas como se prexinan”
“Ni tan sozmesas como deseyan”
Zaragoza a 20 d’Abiento de 2009
aclauroya@gmail.com
A Enrestida 