Zaragoza Antifaixista-Comunicau debán d’as enrestidas polizials

Debán d’as notizias de que Alianza Nazional comboca en Zaragoza o diya 1 de mayo una manifestazión estatal baixo o lema “Por el Obrero Español”, en a carrera Conde Aranda, situada en un siñalero bico multicultural, a Plataforma Zaragoza Antifaixista, integrada por más de 50 colectibos, asoziazions, sindicatos y partius políticos, prenzipió una campaña de denunzia ta conseguir que se biedase. A la fin a manifestazión estió biedada a zaguera ora por Delegazión de Gubierno con unica sincusa. Con tot y con ixo, os/as faixistas amenazoron con benir-se-ne a manifestar y a fer o conzierto que eban programau, que no eba estau biedau.

Debán d’ista situazión a Plataforma Zaragoza Antifaixista fa un clamamiento de mobilizazión ta estar con a chen d’o bico por o que miraban de manifestar-se. Bels 300 antifaixistas nos chuntemos en un punto amanau con as miras d’impedir cualsiquier mena d’acto faixista. A presenzia polizial, dende primeras oras d’o maitín estió brutal, rechistrón e identificón a dezenas de personas. Debán d’a prebatina d’a polizía de bloqueyar a todas as personas que yéranos en o puesto d’a combocatoria d’a manifestazión de CGT, se trigó de surtir en chiquetas collas. A polizía no tremoló en cargar y enrestir barias begadas: dos zagalas estión pateadas y detenidas con l’amenaza polizial “imos a fer serbir con busatros a tecnicas faixistas contra las que tos soz manifestando”, dos chobens circulaban en bezicleta y a uno d’ellos lo aturón, le rancón a pitón que lebaba colgada en o güembro, le tallón a rueda y le dizión “tranquilo que tenemos tot lo diya ta pillar a o tuyo colega”… Tot isto suzedendo, os/as antifaixistas caminábamos por as carreras d’o bico de San Pablo, acosaus/das por a polizía quitando-nos d’os bars e identificando-nos repetidas begadas. Con tot y con ixo continábanos en o bico. Se beyó a dos colletas de nazis, una de 3 personas que estió protechida por a polizía secreta, y unatra de 8 que los identificó a polizía y los escoltó. A chen d’a Plataforma Zaragoza Antifaixista remaniemos bella oras por o recorriu d’a manifestazión d’Alianza Nazional y por a plaza d’o Portillo an que iban a dar o mitín, conseguindo que iste no se fese. A normalidat en o bico por parti d’a bezindat estió plena.

D’atra man, as manifestazions de l’1 de mayo, combocadas por CGT y CNT sufrión a enrestida polizial. Estión identificaus/das os/as compañers/as de CGT que saliban d’o local d’o Sindicato con os siñals y pancartas camín d’a manifestazión que estió en tot momento acompañada de dotazions polizials y de bellas collas de “secretas”. Por a suya parti, a manifestazión de CNT, que saliba meya ora más tardi y pasaba por metat d’o recorriu d’a de Alianza Nazional, estió escoltada firme. Al rematar a manifestazión de CNT a Polizía Nazional enristió a tres chobens que acudiban a prener l’autobús en Plaza de Portillo, cuan os chobens iba a amostrar a suya documentazión estión empentaus/das y agredius/das, con o resultau de un firme trucazo en o tozuelo produziu por un porrazo a una d’as menors y a detenzión d’a suya chermana (atra menor) y atro choben que las acompañaba.

D’os/as cuatro detenius/as, a menor dimpués d’aber pasau por l’Espital Probinzial cuyo parte medico no fazió constar as esclateras nafras produzidas por os achens en a detenzión, sino que os unicos datos que refleixaba o parte yeran que no yera embrazada u que no teneba alerchias a los medicamentos, entre atras, a menor estió puesta en libertat, chunto con o suyo compañero, a zaguera ora d’a tardi. As atras dos zagalas pasoron a nuei en os calabozos de chefatura, estando puestas a disposizión chudizial a la mañana benién y puestas en libertat con cargos d’atentau a l’autoridat a las 14:30.

Dende a Plataforma Zaragoza Antifaixista queremos transmitir a dualidat d’as impresions produzidas o 1º de Mayo, por un costau a satisfaczión que tenemos a l’ebitar a manifestazión razista grazias al gran treballo de todas as collas que formamos a Plataforma Zaragoza Antifaixista con o refirme d’a gran mayoría de bezins/as d’o bico de San Pablo y con a cantidat de personas que acudión o 1º de mayo a amostrar o suyo refuse a cualsiquier actitut razista, faixista, omofoba y xenofoba y a reibindicar o diya d’a clase treballadera natiba u extranchera. Per atro costau, manifestamos a nuestra sensazión d’aber estau engañaus/das por Delegazión de Gubierno ya que l’actitut biolenta y prebocatiba que en tot momento mantubioron as fuerzas de seguridat de l’estau estión, en palabras d’a propia polizía, orden directa de Delegazión de Gubierno. Con ista actitut o Delegau de Gubierno ha demostrau que no ascuita as inquietuz ni as propuestas d’a ziudadanía, ista bez representada por as más de 50 asoziazions bezinals, culturals, d’inmigrans, de pais y mais d’alumnos, partius politicos, sindicatos y colectibos sozials.

Queremos deixar esclatero a responsabilidat y a ineficazia de Delegazión de Gubierno al tratar un tema tan serioso como ye o que Zaragoza se ha consolidau como capital d’as actibidaz d’organizazions y colla d’ultradreita y neonazis. Como en iste 1º de Mayo que acudión enta Zaragoza dezenas de neonazis de diferens partis de l’estau y d’Europa, chuntando-se en a Plaza d’o Pilar y fendo a la fin o conzierto. U como a combocatoria d’o partiu ultradreitista Mobimiento Sozial Republicano (MSR) prebista ta o proximo sabado 9 de Mayo en o CC Almozara.

Construigamos una Zaragoza libre de tot razismo, faixismo, xenofobia y omofobia.