VIIena Cursa contra la Macrogarchola de Zuera

A Iniziatiba Ziudadana contra as “Macrocárceles” tos comboca o domingo 19 d’abril de 2009 a la VII Marcha contra la Macrogarchola de Zuera.

Si querez benir de difuera de Zaragoza, ¡ soz combidaus ¡, fer-nos plegar un correu a la organizazión y nos meteremos en contacto. Podemos mirar de bosar o biache, si ye en bus organizau. Feremos un programa en directo y lo sentirán dende dentro, si querez interbenir-ie, estiaño tamién se ubre a posibilidat de fer-lo por teléfono (ya tos lo fazilitaremos o numero a os/as intresaus/das).

En fin que bi abrá: Vermú, chenta, radio, teyatro, conziertos, moñacos, taller de postals, espardidura de materials y muitas reibindicazions… ¡animaz-tos!

 

Estiaño queremos trucar o ficazio en a situazión d’os menors recluyius en reformatorios, en os clamaus “Centros de reforma para menores infractores” por cuanto, se i ha contrimostrau, cómo istos zentros continan os mesmos parámetros que os zentros penitenziarios: enzierre, isolamiento, regulazión restrictiba de permisos de salida y besitas, cacheos, medicazión indiscriminada, manca d’alternatibas… ye dizir, como en a garchola.

Baixo o bateaguas instituzional d’un supuesto “intrés d’o menor” se chustifica y s’amaga o emplego de midas de seguridat, primando istas actuazions sobre cualsiquier atra opzión educatiba, sin dar garra rispuesta efectiba a l’orichen sozial d’os problemas… ye dizir, como en a garchola.

O paso por istos Zentros suposa en muitas ocasions un trampolín y un etiquetache prebio enta la garchola d’adultos, lo que contrimuestra o fracaso instituzional d’ista mena de Zentros. O mesmo fracaso que benimos, constatando dende fa decadas en as garcholas d’adultos.

Y ye que, tal y como benimos denunziando dende a Primera Cursa  ta la Macrogarchola de Zuera, ye de dar o fracaso de tot d’o sistema penitenziario de l’Estau Español que, entre atros records, ye o sistema europeyo que tiene más personas presas por abitador (cuan leigas istas ringleras ya seremos 75.000 personas bibindo en garcholas), manimenos ista cantidat gran de personas presas no se traduze en un sentimiento de más seguridat en  a poblazión, y isto cuan, antimás, practicamén todas as personas presas cumplen a condena integra de tot, sin aczeder a garra mena de benefizio penitenziario.

Dende que dentro en bigor o Codigo Penal de 1995 y as suyas reformas, o tiempo meyo d’estanzia en prisión se duplicó, tot ello porque a lei enampló o tiempo d’as condenas y s’abolió a redenzión de penas por o treballo, y porque os chuezes no fan serbir as penas alternatibas ni aplican os mecanismos de reinserzión sozial.

Debán d’ista reyalidat, nos trobamos con que a mayoría d’a poblazión creye que “se entra y se sale” d’a garchola con fazilidat y que as penas no se cumplen en a suya integridat, cuan isto ye FALSO de tot.

Nomás una minoría (alto u baixo a cuarta parti d’a poblazión reclusa condenada) se benefizia d’os prenzipals instrumentos de reinserzión establidos en a lei penitenziaria, tot extinguindo alto u baixo tres cuartas partis d’as personas presas a suya pena sin que exista un retorno escalonau enta la comunidat.

Por ixo somos en a obligazión de dizir alto y escaltero, que en l’Estau Español ya i hai cadena perpetua, ya se cumplen largas condenas (que pueden durar de 30 a 40 añadas encara sin cometer delitos contra las personas), que no soque produzen infinito dolor a qui las cumplimos y a las nuestra familias y amigos, sino que biene a perchudicar a toda la soziedat. Nos perchudica a toz y todas porque imposibilita cualsiquier reinserzión y porque trancar a las personas con a simple fin de apartar-las d’a soziedat, fa más débil a cualsiquier pueblo.

A irresponsabilidat d’o sistema penal, penitenziario y de “reforma” de menors ha plegau masiau luen. Por ixo, una añada más tornaremos a denunziar a política penal y penitenziaria de l’Estau Español que ya engarchola a os ninos y ninas y que biene a perpetuar as desigualdaz e inchustizias sozials.

Biene-te-ne, refirma… porque sobran as razons. GARCHOLAS NO, MACROGARCHOLAS TAMPOCO.