A Enrestida en as chornadas internacionalistas castellanas

Madrit estió eszenario iste 6 d´abiento d´a zelebrazión d´as IVenas Chornadas Internazionalistas paradas per as organizazions castellanistas reboluzionarias Izquierda Castellana (IzCa) y Yesca, que estioron feitas en o Zentro Sozial Okupau La Traba y que contón con a presenzia de delegazions politicas de bels pueblos en luita contra l´estau espanyol, an que se trobaba a nuestra organizazión en representazión d´Aragón.

 

Dimpués d´a tradizional manifestazión antimonarquica d´o 6 d´abiento contra la constituzión espanyola y per l´autodeterminazión d´os pueblos prenzipioron as Chornadas con una chenta popular castellana que remató con a leutura de poemas que alentoron a os presents a la luita y a resistenzia contra l´espanyolismo y o capital.

 

A meya tardi escomenzipión as charradas d´as delegazions nazionals asistents en una cambra pleniza de chent. A Enrestida estió a primer organizazión en interbenir-ie, y dos companyers fazión una amena y didautica charradeta rezentando a istoria d´o coleutibo, as autibidades que se son feitas dende que se´n creyó y como entendemos a luita per a independenzia d´o nuestro país y per o sozialismo.

 

Continó un representant d´a organizazión catalana Maulets beniu dende o País Valencià parlando tamién d´a istoria d´ista beterana organizazión chobenil que ista anyada ha feito lo suyo benteno cabodanyo.

 

Un companyero canario d´Azarug fazió una charrada amostrando-nos a situazión politica de l´independentismo canario y a suya luita anticolonial y rematoron as interbenzions internazionals con un melitant basco d´o rete Kamaradak que nos explicó en qué consiste iste rete y como s´organizan ta fer efeutiba la solidaridat internazionalista dende Euskal Herria con as luitas d´os pueblos y dende os demás pueblos con Euskal Herria.

 

Dimpués se fazió una chicota rufierta entre os asistents y o publico, an que se charró de bels temas con espezial interés en a situazión d´a Franja d´Aragón y a suya binculazión lingüística con os Països Catalans.

 

As organizazions conbocants estioron as zaguers en participar-ie, charrando un autibista de Yesca d´a  clamada per os meyos ofizials “transizión enta  la democrazia” y d´a constituzión espanyola que agora fa 30 anyos dende que mos estió imposada como un continar d´o rechimen franquista nomás escoscando a suya frontera politica pero amagando a represión contra as nazions y os treballadors conszients. O representant de IzCa fazió un repaso a la istoria d´o Movimiento Popular Castellano y a suya expresión politica, Izquierda Castellana, fundata a partir de organizazions como Unidad Popular Castellana, Mujeres Castellanas o Izquierda Comunera y remeró as zelebrazions comuneras en Villalar dende as primerencas a la fin d´os 70 dica güe.

 

Tamién se fazió una nueba rufierta, ista begada zentrada en as reibindicazions castellanistas y en rematar ísta prenzipió lo conzierto con as collas Diablo Cojuelo, de Castilla, y Obrint Pas, de Països Catalans en un ambient a rebutir de chent, con más de 1500 personas coreando as cantas d´os balenzians a os que tornaremos a beyer o benient 20 d´abiento en Zaragoza n´o Festibal Enrestida´08. Entre as dos collas bi abió un combatibo auto politico de IzCa y danzas tradizionals castellanas que concluyoron con o Canto a la Esperanza, imno popular d´a Castilla comunera.

 

A la finitiba, una chornada plena de emozions, luita y solidaridat internazionalista que nos amostró que en o mesmo corazón de l´estau espanyol bi ha un pueblo que resiste y que cuestiona la existenzia d´ixe mesmo estau que tamién les oprime a els. Cal agradeixer a os companyers y companyeras de IzCa y Yesca y a la chent d´o CSO La Traba la calurosa acullida que nos fazión,  y felizitar-les per o sobrebueno treballo feito, eixemplo d´un Madrit royo, solidario, antifaixista, y prou que sí, castellano.