En 1591, o Chustizia d’Aragón Chuan de Lanuza V, en aplicazión d’os Fueros d’Aragón y dimpués d’un largo prozeso chudizial, falló de traza contraria a os intreses d’o Rei Felipe II de Castiella y I d’Aragón. O prozeso y as reaczions d’o Rei probocón a indignazión de muitos aragoneses que lebón enta una sublebazión ziudadana. Colerico, imbadió y ocupó militarmén o Reino d’Aragón. Prou que, Juan de Lanuza estió ejecutau y decapitau por oponerse a que os echerzitos extranchers de Felipe II de Castiella, dentrasen en o nuestro país. O suyo tozuelo tallau, estió expuesto a o publico más de cuatro añadas, y os cuerpos decapitaus d’os prenzipals liders sublebaus, penchaus sin tozuelo en as murallas d’a ziudat, por espazio de más de 20 añadas. A razón siempre estió, por tanto, d’o costau aragonés.
Consideramos, en razón de l’anterior, a puyada d’o siñal español una manca de rispeto a iste pueblo por diferens razons:
1.-En primer puesto, por o que suposa meter un siñal d’os asesinos d’o Chustizia d’Aragón enfrén d’el. ¿Prexinaz meter un gran siñal franzés fotendo de lapos a Agustina d’Aragón? De seguras que no. Pues nusatros tampoco no queremos que suzeda isto en Zaragoza. O monumento a o Chustiziazgo ya tiene prou con tener-ne una a o suya costau, o edifizio d’a Capitanía Cheneral, o echerzito, siempre garante d’a unidat indibisible d’a suya quiesta España.
2.- Porque, a ziudadanía aragonesa no ha estau consultada sobre a colocazión d’ista. Meter o siñald d’españa en a plaza d’Aragón ye una dezisión caziquil y coactiba d’o nuestro alcalde, a tamás d’as queixas que’n han surtiu. En a mesma clau de carenzias democraticas, cal dizir bien esclatero que o siñal que se i ha penchau, dengún de nusatros como ziudadanos, lo emos trigau; ye un siñal imposau en o tristemén zelebre golpe d’estau faixista de 1936. Dengún prexina meter en Alemania u Italia un siñal d’as suyas dictaduras correspondiens. Pero aquí bale tot.
3.- Debán d’un monumento zebil a la esfensa d’a legalidat y as libertaz, o PSOE nos ha trayiu un siñal melitarista, de man de melitars, ta omenachear as “birtuz” melitars. A plaza d’Aragón ha deixau de omenachear a qui s’estimó, a costa d’a suya bida, disolber un exerzito, o aragonés, antis que fer una masacre, ta estar o epizentro d’os dreitos d’os amotinaus, d’o 18 de chulio de 1936.
O “regalo” que queremos d’o Menisterio d’Esfensa no ye o d’un siñal; queremos a rebersión de toz os espazios que tiene en o suyo poder o exerzito. Queremos aczeso de toz/todas os/as Zaragozanas/as enta las peszinas melitars d’o Soto de l’Almozara, queremos que nos tornen o control zebil de l’aeropuerto de Zaragoza, queremos que deixen d’abentar bombas en o poligono d’as Bardenas y queremos que nos tornen o poligono de tiro de San Gregorio que ocupa más d’un terzio d’o termino monezipal de Zaragoza.
4.- Porque fer serbir a resistenzia popular en os “Sitios” ta chustificar o “banderón” d’a Plaza d’Aragón, ye un mentira istorica. Prou que, en 1808, os ziudadanos y ziudadanas aragonesas, se opuson a la imbasión napoleonica. Debán d’ella, o suyo primer istinto estió prener as istituzions, prenzipiando por as Cortes y incluyendo-ie a o Chustizia, a diferenzia d’a resta de pueblos d’a monarquía de Fernando VII. Como Gubierno soberano, Aragón organizó a esfensa y mantenió relazions con a resta d’os territorios borbonicos d’a Peninsula, pero tamién con o Reino Uniu. Zaragoza y a suya chen estión qui lebón o peso d’a luita contra o exerzito franzés, un pueblo pleno d’eroninas y eroes populars aragoneses. O chilo fue Viva Aragón, y estió o siñal d’Aragón la que ondeó en os Sitios. Entre atras cosas, o siñal español no se fazió ofizial dica 1843, 35 añadas dimpués.
Por más que le pese a l’alcalde, Sr. Belloch, Zaragoza ye a capital d’Aragón y, ni negando a existenzia a la Comarca de Zaragoza, ni sacando a cuatribarrada d’os taxis u d’a EXPO, ni metendo “banderons” en fren d’o Chustiziazgo, Zaragoza dixará d’estar Aragón.
MOBILIZA-TE CONTRA O SIÑAL D’ESPAÑA
¡ESPAÑOLA AU D´ASTÍ!
TA FORA O SIÑAL ESPAÑOL D’A PLAZA D’ARAGÓN!
A Enrestida 
Retroenllaç: Con su cabeza, nuestras libertades, un año más | Purnas en o zierzo