Una corsa de 1.300 quilomètres per demandar que la lenga d’òc siá declarada patrimòni de l’umanitat 
Aprèp setanta jorns, la caminada Occitània a Pè, entrepresa per membres de Chambra d’Òc, finís uèi, oficialament, a Vielha. Los caminaires seran recebuts per Francés Boya, sindic de la Val d’Aran, e l’ensemble Aire de Prima lor ofrirà, sus la plaça del Conselh General, un concèrt per celebrar la fin de la corsa, que comencèt lo 30 d’agost a Viani (las Valadas) per demandar que la lenga d’òc siá declarada patrimòni mondial de l’umanitat.
Al long de la corsa los caminaires an rencontrat d’occitanistas pertot ont son passats, e an participat ensemble a d’accions e a de fèstas per la promocion de la lenga d’òc.
L’espaci occitan, prèp de 200.000 km2, comprén lo miègjorn de l’estat francés, las Valadas de l’estat italian e la Val d’Aran. La lenga d’òc es, normalament, parlada per dos milions de personas (e compresa per fòrça mai) dins lo país occitan, e quitament a la Gàrdia, un vilatjon de la Calàbria, abitat per d’emigrants piemonteses qu’i arribèron al sègle XV.
Dempuèi de temps la lenga d’òc ven d’obténer, finalament, qualque reconeissença sociala, institucionala e oficiala (en las Valadas, en la Val d’Aran e mai en Catalonha; quitament la constitucion francesa ven de reconéisser las lengas regionalas). De mai, es la lenga de comunicacion d’un quarantenat d’escoletas bilinguas, d’un trentenat de radios localas e d’un larg malhum d’organisacions, coma l’Institut d’Estudis Occitans (IEO).
A Enrestida 