L’españolismo fa fracasar a o gubierno aragonés en o mundo empresarial.

Seguntes as zagueras notizias, Pla-za servicios aereos ye pensando en trancar a interpresa iste mesmo més. Nomás una añada y pico dimpués de prenzipar con o suyo primer buelo promozional, enta Santiago de Compostela. Lo que en primeras sería a primera gran interpresa d’aeronabegazión con partizipazión aragonesa (semipublica) ha resultau estar o gran fracaso d’un gobierno d’Aragón que contina sin creyer-se as posibilidaz d’Aragón en Europa. Lo que prenzipió como un definitibo empente enta os buelos comerzials de l’aeropuerto de Zaragoza, (l’empente melitar siempre lo han teniu) ha rematau por ebidenziar a manca d’ideyas y a imposibilidat de pensar dillá d’España, dende o nazionalismo españolista d’a D.Ch.A. Y atro nuebo prochecto an que parix que a la soziedat no le fa mica duelo malfurriar os diners de toz os nuestros impuestos sin garra tiento.

Ya l’año pasau abión de trancar a linia Zaragoza-Tolosa, un destino mal pensau, que ye a tasamén 4 oras por carretera dende Zaragoza, que cuenta ya con una linia regular d’autobuses dende Zaragoza y t’an que bi ha poblazión altoaragonesa, como a belsetena, que le cuesta lo mesmo tiempo d’ir-ie que o biache enta Zaragoza.

A resta de destinos remataría con Malaga y Santiago de Compostela. Destinos que nomás por o suyo nombre dixan esclateras a endrezera d’ista interpresa dirichida por o bizeconsellero d’Obras publicas, Carlos Escó, a qui no le ha tremolau a man ta destituir a diferens directibos en a curta bida de Pla-za. Debiu a la manca de pasachers dende o prenzipio.

L’ochetibo yera o turismo, pero as curtas bistas d’os conselleros d’a D.Ch.A. no brincaban a muga d’o Pirineos. Quereban tener bien conectaus os santismos patrons españols Pilar-Santiago, y Andaluzía bien amanada ta poder aprender ixe riquismo folklore que ellos ya claman “español” y que ha plenau os actos d’a EXPO. Continan sin entender que o turismo aragonés ye cada begada más endrezau enta atros Estaus d’Europa, y as relazions umanas y comerzials son cada begada más luen d’España. Gallegos y andaluzes ben d’estar igual d’ilusianaus con istos buelos porque o ran d’afluyenzia ha estau nulo.

O suyo españolismo lo mulla tot, como una taca en meyo d’o trache nuebo. Malas que dentras en a suya pachina www.plazaserviciosaereos.net  leyes: Venga a Zaragoza, una de las principales ciudades de España. La capital de la región de Aragón está situada a orillas del río Ebro, a medio camino entre Madrid y Barcelona.

Ixa ye a presentazión de Zaragoza dende o Gubierno d’Aragón; no plegan a más. Con a unica opzión de poder leyer a pachina en castellano, con lo que se entiende ta que mena de publico ye endrezau y que imachen quieren que tienga a resta de l’Estau de tu. Truca o ficazio que, manimenos, en as presentazions de Malaga u Santiago no faigan garra referenzia a qué “región” perteneixen ni a que “país”.

En l’atro costau, como eixemplo, una compañía irlandesa ha sabiu beyer enta do iban as nezesidaz d’os aragoneses (no yera difízil), istalando primero buelos enta Londra y Bergamo, dimpués enta Roma, Charleroi y a suya base d’Alicante (nomás por ixa razón).

Cada diya ye más esclatero cuala ye a suya estratechia. O túnel d’o canfranero no dixa d’estar una tapadera, d’os partius y os meyos de comunicazión españolistas, que han feito serbir dende que remató a Dictadura ta encubrir a suya incapazidat ta brincar a muga enta difuera de l’Estau español.

Aquesta entrada ha esta publicada en A Enrestida. Afegeix a les adreces d'interès l'enllaç permanent.

Deixa un comentari

Fill in your details below or click an icon to log in:

WordPress.com Logo

Esteu comentant fent servir el compte WordPress.com. Log Out / Canvia )

Twitter picture

Esteu comentant fent servir el compte Twitter. Log Out / Canvia )

Facebook photo

Esteu comentant fent servir el compte Facebook. Log Out / Canvia )

Google+ photo

Esteu comentant fent servir el compte Google+. Log Out / Canvia )

Connecting to %s