Os internautas se son mobilizando por empentar un boicot enta la canal de telebisión Telecinco por aber meso la canal a disposizión d’os empentadors d’o manifiesto españolista “Por una luenga común”. Os empentador d’ista campaña de boicot demandan a desintonizazión de Telecinco. A campaña consiste en nimbios masibos de correus electronicos con referenzia “Pasa-lo”. Os empentadors d’o boicot, y nusatros mesmos, denunziamos que a cadena “comparte as esichenzias d’o Manifiesto que demanda que o Congreso d’os Deputaus faiga una normatiba ta fixar que o castellano siga a luenga ofizial y preeminén en tot lo territorio estatal”.
Antimás, cal remerar que Telecinco metió “a disposizión d’o colectibo que ye empentando ista iniciatiba a suya canal de telebisión ta dar refirme a iste prochecto”. Una mida inedita dende que se remató a dictadura franquista.
O mail de boicot remata dizindo que “Si ellos s’adieren a o manifiesto, nusatros nos aderimos enta o boicot. Telezinco nunca más! Pasa-lo!”
Actualmén, Telezinco ye líder d’audienzia en comunidaz con luengas diferens a o castellano como Catalunya. Os empentadors d’iste boicot dende Catalunya remeran que “en o suyo inte consiguión fer-nos respetar debán de Pascual. Agora ye a ora d’impedir que se salgan con a suya aquellos que no entienden lo que significa o respeto enta una luenga”. D’atra man, TeleMadrit, a telebisión publica d’a Comunidat de Madrit tamién se ha aderiu enta o Manifiesto por una luenga común. Isto zaguero ya no nos extraña tanto dimpués de que Esperanza Aguirre aiga tornau a ista canal en o aparato meyatico d’o PP por meyo d’una ripa de despidos improzedens y imposando a zensura como ferramienta cutiana. O compromis de serbizio publico de telezinco ye agora más que en duda y ya bi ha partius en el Estau español que ban a lebar enta o parlamento una proposizión no de lei ta que as luengas coofizials sigan difundidas en as cadenas de TDT.
Seguntes Telecinco, ellos “siempre han dau sobradas muestras de rispeto y refirme a las luenas coofizials” y siñar iste manifiesto no suposa estar en contra d’a resta de luengas. Manimenos, y tornando entra o nuestro caso de l’aragonés, nunca no se ha bisto garra posizionamiento enta una luenga como a nuestra, de berdat en peligro de desaparizión, por parti d’ista canal. A nuestra luenga ha estau refirmada, ista begada sí, por intelectuals unibersitarios de meya Europa; pero isto parix no les importa.
Ista canal nunca no ha meso ha disposizión d’as luengas minoritarias un espazio y en o caso d’Aragón garra begada cuenta nian con imáchens propias por no tener aquí una delegazión.
A Enrestida 