A Enrestida diya par d’atro

O 18 de chulio tornaba por segunda begada t’Artieda o festibal choben independentista en contra de l’esferra y barbarie de l’entibo de YESA. Una fiesta ta trucar o ficazio de toz os gobernans que, limpio expropiar y fer leis antimeyoambientals, quieren deixar bueda la montaña aragonesa. Dimpués de zinco añadas tornábanos enta Artieda, a plegada no se les feba difízil a los que por ixas calendatas ya i estión, pero ista begada bi eba muita chen choben nueba. Nuebas zonas d’acampadas distribuyidas en trazas por a chen d’o lugar y a organizazión ta que os rezien plegaus isen acampando.

Chusto antis de zenar a casa de reunions d’o lugar fería buena onra ta combocar a toz os militans d’o MLNA ta una rufierta. Ista rufierta sería o punto de trobada de chen que por trobar-se bibindo en atros puestos d’o País no gosan partizipar d’o debate politico que muitas begadas se zentraliza en Zaragoza. Artieda, Chaca, Canfranc, Zinco Billas, Llitera, Ribagorza ,… Puyalón, Chobenalla, U.C.A., SOA, Astral y A Enrestida i serían representaus.

O debate politico dio paso enta la zena y posterior fiesta con os Dj’s cangrajeros d’a Llitera. Punchadiscos de soul, reggea, ska,… incansables fendo bullir a borina d’a tabierna d’Artieda, tot charrando en roldes talmén d’a próxima campaña en contra de Yesa, u d’o BIC,…

O maitino d’o sabado sería pleno d’arribadas. A primera d’unos personaches bestius de berdes que feban creyer que tot ye suyo, dondiando por as zonas d’acampadas identificando-ie toz os asistens. Afortunadamén o buen fer d’as chens d’Artieda remeró de qui yeran ixas tierras. A segunda arribada más falagosa, d’os compañers benius en bus dende Zaragoza y Uesca.

Luis Solana, presidén de l’asoziazión Río Aragón y exalcalde d’Artieda, ufrió una completa charrada sobre a situazión de l’entibo de Yesa, qui millor que el ta explica-lo y fendo serbir a luenga aragonesa. A l’ora d’a chenta ya se iría beyendo una mayor afluyenzia d’a chen. As chentas, zenas,.. han estua uno d’os prenzipals puestos de trobada. As largas mesas feban de soporte ta las charradas y degustazions. Ya a las 5 d’a tardi d’o sabado os diferens colectibos y distribuideras i fuoron montando os suyos puestos de materials ta dar a conoixer as actibidaz, campañas, zentros sozials,… que funzionan a l’arreu d’Aragón. Os chuegos tradizionals en a plaza dio paso a o pasabillas que esnabesó lo lugar durante 2 oras y meya; o momento an que más de 300 personas se chuntón en o preto d’o lugar.

Ya de nueis a mosica d’as collas como Prau, Azero, Txirigol, El trono de Judas,… irían puyando o bolumen d’os chilos y borina en o pabellón d’o lugar. Entre colla y colla un acto politico con a lectura d’un manifiesto en fabor d’a esfensa d’a Tierra y en contra de l’entibo de Yesa; siempre con o refirme d’o bloque independentista de cuchas enta la chen d’Artieda y redolada.

A tornada sería dura, pero siempre queda o poso d’ixa nueba chen conoixida, d’ixos nuebos prochectos fablaus,… y d’un nuebo festibal an que trobar-nos bien luego.

MESTIZA

O zaguer 24 de chunio se presentaba o festibal Artieda’09. Organizau por o B.I.C. y a chen d’o Salzar d’Artieda se dió cabida dentro d’a semana cultural d’a Madalena ta poder informar-ne más y fer un acto publico an que replegar dudas, informazión y situazión de l’estau d’o macroprochecto d’enamplazión de YESA. Menaza prenzipal d’o quiesto lugar d’Artieda.

A tardi prenzipiaría con a procheczión d’o documental “La cara oculta dels pantans de Franco”, que nos amostraría a reyalidat d’as añadas 40 en os lugars amanaus a las riberas d’a Noguera Ribagorzana y l’Ebro. Afectaus, exiliaus, treballadors,… unas imachens que parixeban yeran acotoladas pero que puede estar que tornen a fer-se reyalidat en Yesa.

Dimpués d’a bisualizazión d’o documental, y con a cambra ya luzindo con aspecto respetable de chen, se dió paso a la presentazión d’os dos bidios de promozión que s’eban feito ta o festibal. Un primer contacto con as collas mosicals y as actibidaz que en o mes de chulio se podrán beyer en Artieda.

En a zaguera parti d’a presentazión os dos ponens posaus en a mesa de charradas ufrirían a os asistens toz os detalles y prebisions ta o festibal: collas, gaiters, chentas, mosica, zona d’acampada,… no sin oblidar os trangos a dar decamín ta conseguir o bono de biache en bus dende Zaragoza, Uesca y Chaca.

Entre os datos a dar no podrían faltar os zaguers datos de l’actualidat de YESA asinas como a istaria d’a suya resistenzia dende abe asabelo de tiempos. En a charrada d’o 18 de chulio, que se dará chunto a la chen de solidarios con Itoitz se i dará, se’n informará más y más fundo sobre a prenzipal enchaquia de l’acampada-festibal.

YESA siempre NO.

Un buen cabo de semana pleno de fiessta, mosica, cultura y charrazos. Chen benida de muitos puestos de l’antiga Corona d’Aragón nos trobemos en Massalió ta disfrutar y partizipar d’a segunda Fira de música i cultura aragonesa. Dende bien luego prenzipiaban as asoziazions a plenar os chiringuitos de libros, discos, ropa, artesanía,…; u colectibos politicos como A Enrestida-BIC u CNT ta dar acullida a las primeras bandas de Rock: Txirigol, Gen,… que darían paso ya a las 6 d’a tardi al puyal de collas de Gigans y donzainers benius dende diferens puestos; entre ellos os biellos conoixius de “Profes prou” con as suyas esbielladas melodías. Ta rematar ya de nueis un conzierto que lebaría dica las 7 d’o maitino con un publico entregau a las collas que en a suya gran mayoría dan bida a magofermín. Norabuena a toz y todas!

(més…)

Debán d’un soleau y caluroso sabado nos chuntemos un puyal de collas, tanto de balonzesto como de fútbol, en o C.D.M. Actur con un ochetibo común. Fer un diya de fiesta y confraternizazión ta remerar a la soziedat que Zaragoza ye un ziudat antifaixista. Asoziazions d’inmigrans, colectibos chitanos, asoziazions culturals, colectibos politicos, coordinaderas,… chen de mui diferens puestos y tendenzians con a intenzión de pasar-se-lo bien. Astí estió tamién una representazión de A Enrestida con equipo de fútbol y balonzesto fendo-lo lo millor que podió. Más de 40 equipos de fútbol, 20 de balonzesto y tot isto tamién acompañau con una organizazión perfecta de tot que mantenioron en tot momento bien alimentaus e idrataus a os escruxinaus esportistas. Asperemos que ista iniziatiba contine muitos años mas, a lo menos con mesmo ran que estiaño. Norabuena a la Coordinadera antifaixista de Zaragoza.

Debán d’as notizias de que Alianza Nazional comboca en Zaragoza o diya 1 de mayo una manifestazión estatal baixo o lema “Por el Obrero Español”, en a carrera Conde Aranda, situada en un siñalero bico multicultural, a Plataforma Zaragoza Antifaixista, integrada por más de 50 colectibos, asoziazions, sindicatos y partius políticos, prenzipió una campaña de denunzia ta conseguir que se biedase. A la fin a manifestazión estió biedada a zaguera ora por Delegazión de Gubierno con unica sincusa. Con tot y con ixo, os/as faixistas amenazoron con benir-se-ne a manifestar y a fer o conzierto que eban programau, que no eba estau biedau.

Debán d’ista situazión a Plataforma Zaragoza Antifaixista fa un clamamiento de mobilizazión ta estar con a chen d’o bico por o que miraban de manifestar-se. Bels 300 antifaixistas nos chuntemos en un punto amanau con as miras d’impedir cualsiquier mena d’acto faixista. A presenzia polizial, dende primeras oras d’o maitín estió brutal, rechistrón e identificón a dezenas de personas. Debán d’a prebatina d’a polizía de bloqueyar a todas as personas que yéranos en o puesto d’a combocatoria d’a manifestazión de CGT, se trigó de surtir en chiquetas collas. A polizía no tremoló en cargar y enrestir barias begadas: dos zagalas estión pateadas y detenidas con l’amenaza polizial “imos a fer serbir con busatros a tecnicas faixistas contra las que tos soz manifestando”, dos chobens circulaban en bezicleta y a uno d’ellos lo aturón, le rancón a pitón que lebaba colgada en o güembro, le tallón a rueda y le dizión “tranquilo que tenemos tot lo diya ta pillar a o tuyo colega”… Tot isto suzedendo, os/as antifaixistas caminábamos por as carreras d’o bico de San Pablo, acosaus/das por a polizía quitando-nos d’os bars e identificando-nos repetidas begadas. Con tot y con ixo continábanos en o bico. Se beyó a dos colletas de nazis, una de 3 personas que estió protechida por a polizía secreta, y unatra de 8 que los identificó a polizía y los escoltó. A chen d’a Plataforma Zaragoza Antifaixista remaniemos bella oras por o recorriu d’a manifestazión d’Alianza Nazional y por a plaza d’o Portillo an que iban a dar o mitín, conseguindo que iste no se fese. A normalidat en o bico por parti d’a bezindat estió plena.

D’atra man, as manifestazions de l’1 de mayo, combocadas por CGT y CNT sufrión a enrestida polizial. Estión identificaus/das os/as compañers/as de CGT que saliban d’o local d’o Sindicato con os siñals y pancartas camín d’a manifestazión que estió en tot momento acompañada de dotazions polizials y de bellas collas de “secretas”. Por a suya parti, a manifestazión de CNT, que saliba meya ora más tardi y pasaba por metat d’o recorriu d’a de Alianza Nazional, estió escoltada firme. Al rematar a manifestazión de CNT a Polizía Nazional enristió a tres chobens que acudiban a prener l’autobús en Plaza de Portillo, cuan os chobens iba a amostrar a suya documentazión estión empentaus/das y agredius/das, con o resultau de un firme trucazo en o tozuelo produziu por un porrazo a una d’as menors y a detenzión d’a suya chermana (atra menor) y atro choben que las acompañaba. (més…)

Dimpués de bellas añadas, muitas actibidaz, baralla,… a chen de A Enrestida emos de felizitar y agredeixer a tot lo mundo que partizipó en as actibidaz que se parón o sabado 20 d’Abiento. Nunca antis no s’eba bisto l’ambién y a luita que en zagueras se ye beyendo por o nuestro zentro sozial y en as actibidaz que’n surten. Nomás animar a toz/todas a continar asinas, de seguras que a flama nunca no s’amortará. Aquí tos dixamos una foto d’a mulitudinaria chenta que se ufrió o sabado en o ZSA A Enrestida con a colaborazión d’o B.I.C.: mosica, charrazos, birolla,.. Muitas grazias a toz os que i estiez:

Madrit estió eszenario iste 6 d´abiento d´a zelebrazión d´as IVenas Chornadas Internazionalistas paradas per as organizazions castellanistas reboluzionarias Izquierda Castellana (IzCa) y Yesca, que estioron feitas en o Zentro Sozial Okupau La Traba y que contón con a presenzia de delegazions politicas de bels pueblos en luita contra l´estau espanyol, an que se trobaba a nuestra organizazión en representazión d´Aragón.

Dimpués d´a tradizional manifestazión antimonarquica d´o 6 d´abiento contra la constituzión espanyola y per l´autodeterminazión d´os pueblos prenzipioron as Chornadas con una chenta popular castellana que remató con a leutura de poemas que alentoron a os presents a la luita y a resistenzia contra l´espanyolismo y o capital. (més…)