A Enrestida diya par d’atro

O capitalismo ye en crisis, a economía perigla. U ixo dizen. Somos en crisis, a mayor d´o sistema capitalista dende 1929. Manimenos encara no beyemos a os capitalistas abentar-se por as finestras d´os bancos como allora. A plebia más beroya que podríanos asperar en tiempos de sequera etica.

Pero se puede charrar d´un sistema economico en crisis cuan a suya existenzia ya ye una crisis cutiana? Un sistema que dende a suya naixedura ha prebocau millons de muertos, guerras imperialistas, miseria, inchustizias de toda mena… que no ye capable de guaranziar as nezesidaz alazetals d´a población mundial, que asesina per meyo de fambre y enfermedaz a milenta de personas toz es diyas, que niega la bida y a libertat, que nos condena a o treballo asalariau, ixo ye o capitalismo. Y ixo dizen que agora ye en crisis, nomás perque afeuta a os intereses d´os poderosos.

Son muitas as opinions que se i pueden trobar, dende que ye una crisis prebocada per os mesmos capitalistas ta que o sistema contine dimpués más reforzau (Naomí Klein) dica que ye una situazión parellana a o colapso d´a URSS en 1991 (seguntes l´istoriador marxista Eric Hobsbawm), que sinnificó a cayedura d´ixe rechimen de capitalismo d´estau clamau “sozialista”. De cualsiquier traza ye curioso beyer a os grans esfensors d´o liberalismo más furo trucar en a puerta d´os estaus ta demandar-les millons de euros/dolars que les apañen o negozio u refirmar nazionalizazions de bancos. 

Debán d´isto cal reprener un discurso antagonista y de clase, els han creyau toda ista esferra, os suyos intereses no son os nuestros, no queremos continar bibindo asinas. Iste ye l´inte de fer una enrestida firme a o sistema, perque ni els se creyen ya que o capitalismo pueda funzionar. Y amostrar l´alternatiba, prenzipiar a construyir o sozialismo dende Aragón diya par d´atro. Iste ye tamién un d´os retos d´a cucha independentista, ofreixer una alternatiba reboluzionaria a o nuestro pueblo y como internazionalistas fer-lo chunto a toz os pueblos oprimius. Ye l´inte de resistir, de conspirar y de creyar.